- di Nino Algeri -

Nu contadinottu di la Castania

pi ccattari roba ‘n città vinia

juntu ‘nte vicinanzi di la Giustra

vitti di miluna ‘na bedda mostra.

Pi spiari, s’avvicinau curiusu

nun sapennu di ddi palli l’usu

‘u fruttaiolu, scattru e birbanti

capìu subbitu chi era ‘ngnuranti.

‘U castanotu, cu l’occhi ffruntusi,

ci dumannau ch’eranu ddi cosi

u giustrotu c’’a risposta pronta

ci dissi lestu:< ova i jinenta>

Dui si nni ccattauu ‘i ddi muluna

pi lu prezzu litigau pi ognuna

‘i misi ‘a tracolla ‘nta sacchina

e pigghiau ‘a strada d’’a cullina.

A mità via ci scappau un bisognu

pusò ‘a sacchina, si guardau ‘ntornu,

pi sutta ‘i muluna ruzzulianu

contru ‘na petra granni si spaccanu.

‘U castanotu spiranzusu seguìa

‘u ruzzuliamentu di dda sacchina.

iddu, cu l’occhi firmari ‘a vulia

da petra granni quarchi metru prima.

In carchi modu ‘i vulia sarvari

pi stu motivu si misi a gridari

di na troffa a petra dda vicinu

du cunigghia galoppannu scappanu

Appressu ci curriu pi li pigghiari

pi putirili ‘nta stadda nsirrari

i cridìa du putri appena nati

di ddi ova a matina ‘ccattati