Quattru casi jittati a ribba ’u mari

strati di rina e varchi ‘i piscaturi

du’ lanci e sei pacioti pitturati

risacca d’unna ca mi ricria lu cori …

La sira p’’u tardu poi si vara,

si nesci a mari, si va a travagghiari

all’artaru si jietta la purpara

chi scinni e vasa lu Santu Sarbaturi;

sunnu li casi vasci d’’u Paradisu

chi alla vucca di la Nunziata

avi du’ seculi chi fannu la vardata

a la trasuta di lu portu di Missina …

Davanti ‘a fuci c’era ‘nu scareddu

‘na chiesa ci stava dda ‘mpuiata

unni Smiralda Calafatu annava

e certi voti puru si cunfissava;

Pi’ la so’ fidi e cu’ vucazioni

li voti di Clarissa idda pigghiau

a Muntivergini un ghiornu si chiudiu

Supiriora e poi Biata addivintau;

accantu a lu scaru c’era la darsena

unni pusavanu li navi di la posta

lassannu colli, butti e boni novi

e subitu ripigghiavanu la rutta.

Antunellu puru iddu ‘i ‘cca passau

cu li so’ culuri lu Strittu pitturau

lu sannu puru li tunni e li dilfini

chi alla passa s’addununu si ancora

c’è ‘ddu pitturi chi a ribba di lu mari

la vucca di lu Strittu sta a vardari;

Maria Costa salutanu cuntenti

chi canta li biddizzi di lu mari

e un piscispada chi pi’ sti pressi passa

saluta puru iddu e fa ‘a vardata.

Lu chianu di lu puzzu, li curtigghi

unni Giuvanni Pascoli passiava

quannu la duminica cu so’ bastuneddu

scinnia ‘ntra sti casi e s’ispirava.

Maria Costa ‘sti cosi mi cuntau

‘na vota chi a mia s’accumpagnau

idda ‘i Missina canta la so’ Storia

li so’ ligenni e la so’ mimoria;

lu mari li casuzzi e li so’ genti

Maria sapi mettiri in puisia

e oggi chi scinneru li pueti

filici lu so’ cori spisiddia;

Li venti di Sciroccu e di Punenti

l’unna c’ammutta e l’unna ‘i cammaria

li riti stisi pi’ la ripassata

la rema chi poi cancia ‘a matinata;

li cunti di li patri e di li nonni

di quannu a Scilla c’’u luntru si piscava

di quantu cosi rari e quantu canti

chi nesciunu di sta granni littirata;

a idda jò m’inchinu cu’ rispettu

pi essiri la cantura di lu Strittu

a li palori so’e a li so’ rimi

mi sperdu tra Scilla, Faru e i petri niri;

di Scilla vidu la Rocca unni s’abbranca

sghiddiannu lu so’ nomu svinturatu

Cariddi ci rispunni cu’ pussanza

a la Punta di lu Faru ‘ncatinatu;

Scilla la chiama cu’ gridu picanti

chi l’unna di lu Strittu s’arrivota

e jò mi lassu poi sammuzzari

cu lu pinseri a lu funnu di lu mari;

‘dda Colapisci ‘mmutta la culonna

sutta lu Faru e mischinu si lamenta

pi lu pisu immani c’hava purtari

cu’ granni duluri e suffirenza

pi' vuluntà , intera ci la sarba;

Jo’ vi cantai chiddu chi sintia,

mi scusu si pir tantu v’annujiai

Maria Costa passu a salutari,

cent’anni ancora la scutiria cantari

di lu Strittu, di lu mari e di Missina

cu’ la so’ puisia duci, antica e fina.

Antonio Cattino@